Civivoxek poesia eta antzerkia ospatuko ditu ekitaldi bereziekin

Tumatxa Gazteak

Civivox sareak artez beteriko egitaraua prestatu du Poesiaren eta Antzerkiaren Munduko Eguna ospatzeko. Martxoaren 21etik 28ra, antzerkia, poesia eta topaketak izanen dira hiriko hainbat Civivoxetan.

Programazioan bi antzezlan, haur ikuskizun bat, artista-topaketak eta Lorcaren inguruko irakurketa dramatizatu bat izanen dira. Antzezlanetako eta irakurketako sarrerak 3 eurotan daude, eta topaketak, berriz, dohainik izanen dira.

Lehen hitzordua larunbat honetan izanen da, Civivox Iturraman, non Eunice Producciones-ek “El lenguaje secreto” lana aurkeztuko duen, 19:30ean. Obrak maitasuna eta 27ko Belaunaldiko poesia uztartzen ditu, publikoarekin lotura berezia sortuz.

Martxoaren 23an, astelehenez, Salomea Slobodian eta Uxue Razquin poesiaren inguruan ariko dira solasean Civivox Kondestablean, 19:30ean. Topaketa dohainik izanen da, eta Nafarroako Gazteriaren Institutuaren laguntza du.

Martxoaren 26an, ostegunez, Civivox Iturramak Nafarroako arte eszenikoetako profesionalekin topaketa hartuko du. Parte-hartzaileen artean izanen dira Asier Andueza eta Natalia Huarte. Saioa 19:30ean hasiko da eta sarrera libre izanen da.

Ostiralean, berriz, La Bella Otero konpainiak “A fuego” obra ekarriko du Civivox Pompelora. Umorea, satira eta bertso kutsua nahasten dituen ikuskizuna da. Emanaldia 19:30ean hasiko da.

Txikienek ere izanen dute beren tokia. Martxoaren 28an, larunbatez, Musas y Fusas taldeak “Minimundo sonoro” eskainiko du Civivox Mendillorrin. Esperientzia murgiltzailea izanen da, nahiz eta sarrerak jada agortuak diren.

Egun berean, 19:30ean, Civivox Iturraman izanen da “Soñando con Lorca” irakurketa dramatizatua. Federico García Lorcaren obraren inguruko saio berezia izanen da, eta sarrerak 3 eurotan daude.

Sarrerak Civivox sarean, 010 telefonoan edo Pamplona es Cultura webgunean eskuratzen ahal dira.

Poesia eta antzerkia gustuko badituzu, aste honetan planik ez zaizu faltako Iruñean.